Al Arabiata

2020

Text: Susanne Slanzi

Äs schneieled, äs beieled
und Fraiwä schlittlid gschwind
dr Armin leid sini Händschä ah
het Kappä verkehrt uf em Grind
Onlin Ticket bschtellä das isch in
äs gad gschnäll und cheibä ring
Ai d’Mariann beschtellt so sini Kartä
mag chuim uf das Rock-Konzärt wartä
doch am Konzärttag, dass isch krass
gewährt mä dr Frai Abächerli kei Ilass
statt äs Bigliette zeigt der Computer so fein
äs Pastarezäpt mit Fleisch vom Schwein
d’Kassierin diä meint ganz trochä
mit däm Bigliette gahnd sie gschieder hei go kochä.
Megan Markel träumt vom änä wildä, schwarzä Bäri
leider hed sie nur dr doofi, roti Härry
Dr Thiam i dr CS träumt von Spionage-Sache
und laad halb Züri überwachä
D’Megan isch kröndlilos in Kanada
Dr Thiam ohne Bank scho bald in Afrika
Bones die Knochenjäger ä Serie im Fährnseh
ihär hend sie viellicht ai scho gseh
meischt stahd i däm Krimi im Vordergrund
ä grusligä gruisigä Knochä und
doch um das kribbligä Feeling z’ha
muäsch nur zum Wäddliässä i Bahnhof gah
Spieglein, Spieglein an der Wand
Ich gseh kei Spiegel a dr Wand
Bim montierä nimmt är ä z’langi Schruibe
Klirr, muäss mä d’Schärbä zämä suigä
Viär Spiegel uf einisch kaifä das wär glatt
bi der Ikea gäb das Mengärabatt
Ä durzächti Silväschternacht
im Stall het s’neetigscht dr Marco Rohrer gmacht
dr Jochi cha no nid, ai wenn är wett
go s’Veh versorgä im BWZ
dass dr Alkohol so mit eim cha verfahre
är gsehd uis wiä vonerä Walzi uberfahre
ändlich am Namittag chunnt är i Stall
und Chiäh hend grad ä Lachafall
sie gigälid isä Chef sett das si
am Kunschti sini wärid jetzt «la vache quit rit!»
D’Lungerer Weidlihittä diänds renovierä
um tiiri Köschtä z’sparä, ä Wettbewärb lancierä
der Kas de Jonge glaibt är däg spinnä
duäd dr alti Fiirhärd gwinnä
wiä heech das Weidli isch kansch jetzt rate
de gwinsch dui dä Härd, schmecksch de Brate
dr Gwinn dä hed ä rächtä Wärt
dr Kas koched äs 5-Gangmenü uf däm Härd
ola, ciao, hello sind fremdsprachigi Griäss
wenns meh bruicht red är mit Händ und Fiäss
ä flottä Maa, doch das stört
cha nid französisch dr Kunschti Hansjörg
Is Wallis defid sini Chiiä im Summer gah
diänd besser als är französisch verstah
Äs pfifflischwänzlet über de Platz
nei, äs isch kei fräche Spatz
Äs reckt sich bolzägrad i Himmel
nei, äs isch kei stolzä Schimmel
Äs füditätschlet platt is Gras
nei, äs isch kei Hoppelhaas
Dr Lüthi Sandro blutt um Traktorä
hoffentlich hed er keis Ei verlorä
Fabienne Wolf chaift i dr Ikea ä WC-Brillä
sie muäss wiis sie, nid blau wiä dr Himmel oder bruin wiä Gillä
bim uispackä chunnt Fabienne fascht umä Verstand
die Brillä isch blau bis zum üsserschtä Rand
sie wott dä Deckel umtuischä ganz hässig
doch dr Verkeifer meint sehr lässig
hättet sie doch dr Plastik ä wäg gno
de wärdr dr wiis Deckel fürä cho
Bschtelsch ä Schrittzähler bi der Krankekassä
muäsch für a Bonus sportlä wie die beschtä Assä
dr’Andi und Petra Zihlmann diänd lieber hecklä
drum lahnds dr Hund mitem Zähler la umäsecklä
Petra Egger staht im Coop a dr Kassä parat
versteckt ä Packig Pariser underem Salat
sie isch närvös, ängschtlich gid schüüli acht
ihrä Chli dänäbä weiss no nid was mä mit Pariser macht
s’Käthy Windisch packt diä amurösä Dinger
i d’Höchi mit spitzä langä Finger
si trompetet luit für jedes Ohr
hoppla Petra häsch hüt no öppis vor!?
Da luägt dr Ruven verdutzt und lacht
S’Mami chaift si, dass dr Briäder keini Kindä macht.
Nidwaldner fiirid no ihri Seppis
hei diä Rissseckler chenid eppis
ai hends s’Humorfestival «Stans lacht »
hender d’Einbahnstrass für das Festival gmacht?
Koschtä findit iähr nid so gruisig
diä Eintagsfleigä koschtet ja nur 125-tuisig
D’Riebli Schweschterä i dr Jänzimatt-Kapällä
möchtit Gloggä kurz la schällä
Ä Zug a dr Schnuär, s’tätscht durs Gotteshuis
dr Kalle am Bodä, wer chunt da no druis?
Paar Wuchä später het sie der Gwunder pickt
jetzt isch diä Sach doch sicher gflickt
kei Gloggä lütet so schön im ganzä Land
doch därmal risst diä dummi Schnuär abänand
Fraiwä lend Finger vo därä Gloggä bloss
susch hender z’nächstmal dr lieb Gott im Schoss
Dr suiberschti Flughafä isch der niw in Berlin
äs fliegid kei Flieger, äs bruicht kei Kerosin
da gsehsch dui Greta, diä Ditschä chemid druis
sind a dinä Idee sit Jahre vorusi
dui reisisch mit em Sägelschiff uf Amerika
nid alli chennid mit em Schiff go schaffe gah
Als Gmeindspresidänt isch är äs Ass
klopfed ai sehr gärn ä Jass
dr Dunschtigjass in Thun isch glungä
ai Dank em Beat hemmer gwunnä
no Coment...
no Coment...
20 Jahre nach Tomba la Bomba...